Gipahimangnuan sa Davao City Police Office (DCPO) ang publiko nga gidili ang pagpasulod sa mga menor de edad sa mga hotel, inn, ug uban pa nga lodging establishment karong umaabot nga Valentine’s Day, Pebrero 14, 2025.
Sumala pa ni DCPO Spokesperson, Police Captain Hazel Caballero Tuazon, nga magpatuman ang DCPO og hugot nga seguridad aron mapugngan ang mga kriminalidad susama sa pagdala og mga menor de edad, ilabi na karong Valentine’s Day.
Ilang ipatuman ang estrikto nga monitoring ug inspeksyon sa tanan nga lodging establishments ning dakbayan.
Nagpahimangno usab si Tuazon sa mga ginikanan nga magmatngon ug bantayan ang ilang mga anak, aron malikayan ang dili angay nga mga panghitabo.
Gihangyo usab niini ang mga empleyado sa hotel ug inn nga magpakabana ug dili magpasulod og menor de edad aron malikayan ang legal nga kasong ilang mahimamat kung makalapas kini sa balaod.
Gi-awhag usab sa kapolisan ang katawhan nga kung adunay mga bata nga musulod sa inn o motel, isumbong sa mga police stations aron gilayong matagaan og aksyon.
Dugang pa ni Tuazon, padayon nga nagalihok ang DCPO aron maseguro ang kaluwasan sa mga kabatan-onan ug mapadayon ang malinawon nga selebrasyon sa Valentine’s Day.
Gihangyo sa kapulisan ang tanan nga magtinabangay sa pagsunod sa balaod aron malikayan ang mga sitwasyong makadaot sa menor de edad ug sa katilingban.
