DAVAO CITY – Gipasalig sa Davao City Water District (DCWD) nga mo-rasyon kini ug tubig sa mga dapit nga maabot sa ilang mga gamiton nga mga tanker karong adlawa hangtud na sa Enero 23, adlaw nga Martes.
Gisugdan sa pagpalong ang linya sa supply sa tubig sukad kaganinang alas 10:00 sa buntag sa dapit sa Bugac Maa padulong ngadto sa Diversion road hangtud alas 10:00 sa buntag ugma o sulod sa baynte kwatro oras.
Sa tibuok Buhangin ug uban pang bahin sa downtown area, Bajada ug Cabaguio Avenue traynta y sais ka oras nga mawala ang supply sa tubig ug mobalik kini mga alas dies pa sa gabii ugma.
Sa dapit sa Lanang saisenta ka oras nga mawala ang supply sa tubig o hangtud sa alas dies sa gabii sa adlaw nga Dominggo, Enero 21.
Samtang dugay gayud nga mawad-an ug tubig ang mga jabog nga mga dapit sa Lanang, Pampanga, Sasa, ug Panacan gumikan kay mobalik ang pag-agas sa tubig karon pang adlaw nga Martes, Enero 23 alas 10:00 sa buntag.
Sumala pa kang DCWD Spokesperson Atty. Bernie Delema ang water interruption subay kini sa pag-adjust nila sa ilang mga tubo gumikan kay palapdan sa DPWH ang tulay sa Maa.
Sumala pa kang Delima nga bisan kung mahuman dayon nila ang ilang gimbuhaton madugayan ang pagpabalik sa supply sa tubig gumikan kay kinahanglan pa nga hulaton ang pressure recovery time niini.
