Nag-abiso ang PAGASA Davao sa publiko nga mag-amping tungod kay posibleng moabot sa 41 degrees Celsius ang heat index sa Davao City hangtod Agosto 25, 2026.
Matod sa weather bureau, ang ingon ka taas nga heat index mahimong makapahinabo og heat-related illnesses, lakip ang heat exhaustion ug heat stroke, ilabina sa mga tawo nga dugay ma-expose sa kainit.
Dugang pa, giawhag ang publiko nga likayan ang dugay nga pagpabilin sa direktang init sa adlaw, mag-inom og igo nga tubig ug mopahulay sa bugnaw nga lugar kung mobati og kalipong, kakapoy o sobra nga kainit sa lawas.
Gipatin-aw usab sa PAGASA nga posibleng makasinati ang Davao Region og hangtod 60 porsyentong reduction sa rainfall karong Agosto.
Lakip sa mahimong epekto niini ang mas uga nga kondisyon sa panahon ug posibleng dugang kainit sa pipila ka adlaw.
Sa pagkakaron, padayon ang monitoring sa PAGASA sa heat index ug rainfall condition sa rehiyon samtang gipahimangnoan ang publiko nga magmatngon. | VIA BOMBO EROS PAJOTA
