Human sa mga katag-katag nga pag-ulan sa miaging mga adlaw, nabalaka ang pipila ka mga residente sa Davao City tungod sa kainit sa panahon nga nasinati kagahapong adlawa, Agosto 10, 2026.
Mitumbok sa 37.9 degrees Celsius ang heat index sa dakbayan alas 12:00 sa udto, base sa datos sa DOST-PAGASA Davao.
Niining orasa, 31.7 degrees Celsius ang air temperature samtang 65 porsyento ang relative humidity. Giklasipikar kini sa lebel nga “Extreme Caution,” diin posible ang heat cramps ug heat exhaustion kon dugay nga ma-expose sa kainit.
Gipasidan-an usab nga mahimong mosangpot sa heat stroke ang padayon nga pisikal nga kalihokan ilawom sa init nga panahon.
Tungod niini, giawhag ang publiko nga kanunay mag-inom og igo nga tubig ug likayan ang dugay nga pagpabilin ilawom sa direktang kainit, ilabina sa udto.
Gipahinumdoman usab ang mga Dabawenyo nga mangita og landong o bugnaw nga lugar kon magsugod og bati ang paminaw tungod sa kainit, ug hatagan og igong pahulay ang lawas.
Ang maong heat index update gipagawas sa Davao City Disaster Risk Reduction and Management Office o CDRRMO, base sa monitoring sa maong otoridad. | VIA BOMBO EROS PAJOTA
