Midoble ang gidaghanon sa mga lalaking nagpa-No-Scalpel Vasectomy o NSV sa Davao City sa unang unom ka bulan karong tuiga kumpara sa parehas nga panahon niadtong 2025.
Matud sa Davao City Population Office, 254 ka NSV acceptors ang natala gikan Enero hangtod Hunyo, gikan sa 128 lamang sa parehas nga period niaging tuig.
Tungod sa pagsaka sa demand, duha na ka beses matag bulan gihimo sa City Health Office ang NSV operations, gikan sa kaniadto nga kausa lamang matag bulan.
Gipunting ni Population Office head Jerrielyn Lewis nga ang Davao City mao ang bugtong LGU sa Mindanao nga naghatag og libre nga NSV services, apil ang postoperative medicines ug follow-up semen analysis.
Mga 15 hangtod 25 porsyento sa clients gikan pa sa gawas sa Davao City, lakip ang ubang lugar sa Mindanao ug bisan gikan sa Cebu.
Ang NSV molungtad lamang og 10 hangtod 15 minutos, apan kinahanglan gihapon maghulat og tulo ka bulan ug makumpirma nga zero spermatozoa sa laboratory test sa dili pa kini saligan isip contraceptive method. | VIA BOMBO EROS PAJOTA
