Mi-apruba ang City Council sa Dabaw sa unang pagbasa sa usa ka ordinansa nga nagtumong sa pagtukod og centralized data center para sa tanang lokal nga buhatan sa dakbayan. Ang sugyot giduso ni Councilor Bonz Andrei Militar ug nagtinguha sa paghatag og mas lig-on nga seguridad sa digital nga sistema sa lokal nga kagamhanan, subay sa Data Privacy Act of 2012.
Miingon si Militar nga kini usa ka lakang padulong sa digital nga kauswagan sa siyudad, diin ang data sa matag departamento dili na maglainlain ug magkalat sa daghang servers ug databases. Ang kasamtangang fragmented system, sumala niya, dili lamang inefficient apan naghatag usab og dako nga risgo sa seguridad, doble nga paggamit sa ICT resources, ug operational nga problema sa panahon sa emerhensya.
Gipasabot ni Militar nga ang pagkonsolida sa ICT infrastructure dili lang makabarat sa gasto apan mas sustainable ug epektibo. Ang centralized setup maghatag og mas maayong koordinasyon sa mga opisina, mas lig-on nga depensa batok sa hackers, ug mas kasaligan nga digital services para sa tanang Dabawenyo.
Sa sunod nga mga semana, gilauman nga ipadayon ang deliberasyon aron mapalapdan pa ang implementasyon ug masiguro ang episyente nga pagdumala sa impormasyon sa lokal nga gobyerno.
