DAVAO CITY – Makigduyog sa kasaulugan sa National Cooperative Month ang City Cooperative Development Office sa Davao City tabuok bulan sa Oktubre karung tuig.
Gipadayag ni CCDO officer-in-charge Luzminda Eblamo nga magpahigayon ug inter-cooperative Sports Event diin makigsangka ang mga nagkandaiyang kooperatiba sa dakbayan sa paugnat sa kusog sugod karng Oktubre 10 hangtud 19.
Musalmut sab ang mga micro, small and medium-sized enterprises kon MSMEs alang sa Cooperative Trade Fair and Exhibit nga magpakita sa mga gipasigarbong mga produkto sa matag kooperatiba.
Itunong sab ang maong kalihukan sa mahitabong Mindanao Trade Exposition karong Oktubre 18 hangtud 22.
Karung Oktubre 20, pagahimoon ang Cooperative Leaders Conversation uban ang Cooperative Development Authority, ug mga nag-unang ahensya sa gobyerno aron hisgutan ang tanang mga may kalabutan sa kooperatiba.
Mahuman ang kasaulugan pinaagi sa usa ka culminating event karung Oktubre 29 sa usa ka beach resort sa dakbayan.
Makig-alayon sab ang Davao City Water District ug pipila ka mga kooperatiba alang sa proyektong Adopt-a-Site nga makalikom ug hinabang alang sa rehabilitasyon sa mga watersheds sa Davao City.
Tumong sa maong kasaulugan ang mapataas ang importansya sa paglambo sa kooperatiba tungod sa pagtinabangay sa matag myembro, stakeholders ug mga sangay niini sa panggamhanan ug katilingban.
via || Bombo LJ Florendo
