Nagsampa og reklamong kriminal ang Bureau of Internal Revenue (BIR) karong Lunes sa Department of Justice batok nila Herminio “Harry” Roque Jr., Mylah Reyes Roque, ug Percival Sazon Ortega may kalabotan sa mga alegasyon sa paglapas sa buhis nga konektado sa Biancham Holdings and Trading, Inc.
Sumala sa imbestigasyon sa BIR, napakyas ang mga nasangpit nga mosumite sa tukmang tax returns ug mobayad sa angay nga buhis sa pagbalhin sa shares of stock ug sa pagtaas sa authorized capital stock, nga gibanabana nga miabot sa kapin ₱3.35 milyon ang total tax deficiency lakip na ang interes ug surcharges. Nakakita og makatarunganong basihan (probable cause) ang BIR aron kasuhan ang si Roque ug si Ortega tungod sa giingong tax evasion ubos sa Section 254, ug sa dili pagsumite sa tax returns ubos sa Section 255 sa National Internal Revenue Code of 1997 nga gi-amendahan.
Dugang pa niini, nagpasaka usab ang BIR og laing mga kaso batok sa Terjonan Transport Company Inc. ug sa ilang mga opisyal tungod sa wala pagbayad sa VAT sa tuig 2017 nga mokabat sa ₱9.178 milyon. Lakip usab sa mga giakusar si Niefel Mae Heria Demonteverde may kalabutan sa delinquent tax liabilities sa 2019 nga miabot sa ₱8.44 milyon, nga naglakip sa income tax, VAT, ug uban pang obligasyon.
Sa kasamtangan, gipunting usab ni BIR Commissioner Charlito Martin R. Mendoza nga ang maong lakang kabahin sa padayon nga kampanya sa ahensya ubos sa Run After Tax Evaders (RATE) program aron mapalig-on ang koleksyon sa buhis ug mapanalipdan ang kaban sa gobyerno.
