Nagpabiling kusog ang Tropical Depression Ester samtang nagpadayon kini sa pagtabok sa habagatang bahin sa Taiwan, sumala sa state weather bureau.
Nahimutang ang sentro sa bagyo sa gilay-on nga 230 kilometro amihanan-kasadpan sa Itbayat.
Dala niini ang kinakusgang hangin nga moabot sa 45 kilometro matag oras duol sa sentro ug mga paghaguros sa hangin nga moabot sa 55 kilometro matag oras. Naglihok kini paingon sa northeast sa tulin nga 15 kilometro matag oras.
Nagpabilin usab nga nakasaka ang Tropical Cyclone Wind Signal No. 1 sa Batanes.
Sumala sa weather bureau, ang kusog nga hangin sa bagyo makaabot hangtod sa 280 kilometro gikan sa sentro niini.
Gilauman lamang ang minimal hangtod minor nga epekto sa hangin sa mga lugar nga sakop sa Signal No. 1.
Gawas sa bagyo, padayon usab nga gipalig-on sa Southwest Monsoon o habagat ang mga pag-ulan ug kusog nga hangin sa nagkalainlaing bahin sa Luzon.
Nagpagawas usab og pasidaan ang weather bureau ngadto sa mga mangingisda ug operator sa gagmayng sakayan nga likayan una ang pagpalaot tungod sa gilaumang kabangis sa dagat.
Posibleng moabot sa 4.0 metros ang kataas sa mga balod sa kasadpang bahin sa Batanes, 3.5 metros sa kasadpang bahin sa Babuyan Islands ug amihanang bahin sa Ilocos Norte, samtang moabot sa 3.0 metros ang kataas sa balod sa ubang bahin sa Batanes, Ilocos Norte ug Ilocos Sur.
