Hugot nga gikondena sa National Maritime Council (NMC) ang bag-ong agresibo ug delikadong mga aksyon sa China Coast Guard, People’s Liberation Army Navy, Chinese Maritime Militia, ug uban pang pwersa sa kadagatan sa Tsina batok sa mga barko, eroplano, ug mga mananagat nga mga Pilipino sa West Philippine Sea.
Sumala pa nga ang mga ilegal nga kalihokan nagbutang sa peligro sa kinabuhi, naglapas sa internasyonal nga balaod, ug naghatod kadaot sa kalinaw ug kalig-on sa rehiyon.
Gisaysay sa knseho nga niadtong Marso 7, usa ka barko sa PLAN ang nagtumbok sa fire-control radar niini ngadto sa BRP Miguel Malvar duol sa Escoda Shoal atol sa usa ka legal nga patrol, usa ka lihok nga giisip nga hulga sa paggamit og pwersa.
Samtang niadtong Marso 17, ang mga mananagat nga mga Pilipino sa Bajo de Masinloc gi-harass sa mga barko sa Tsina pinaagi sa delikadong pagmaniobra, pagpatingog og sirena, ug pagdeploy og RHIB, nga nakababag sa ilahang legal nga pagpanagat.
Niadtong Marso 20, usa ka eroplano sa Philippine Coast Guard nga nagpahigayon og regular nga maritime patrol unahan sa Kalayaan Island Group gipabuthan og mga flare duol sa Panganiban Reef, nga nagbutang sa peligro sa kaluwasan sa paglupad sa usa eroplano. Sa maong adlaw usab, usa ka barko sa BFAR nag-atubang og delikadong maniobra gikan sa usa ka barko sa CCG sa Paredes Reef (Discovery Great Reef).
Samtang niadtong Marso 26, nakalikay sa bangga ang usa ka barko sa Philippine Navy human sa usa ka dili luwas nga maniobra sa usa ka barko sa PLAN duol sa Pag-asa Island, nga supak sa COLREGs kon Convention on the International Regulations for Preventing Collisions at Sea.
Kining nga mga insidente nahitabo sa mga lugar diin ang Pilipinas adunay soberanya, soberanyong katungod, ug hurisdiksyon.
Ang mga operasyon sa Pilipinas niini nga mga lugar, usa ka legal ug nahisubay sa 1982 United Nations Convention on the Law of the Sea (UNCLOS) ug sa 2016 Arbitral Award.
Sa pikas bahin, ang mga kalihokan sa Tsina niini nga mga lugar supak sa internasyonal nga balaod ug sa 2002 Declaration on the Conduct of Parties in the South China Sea (DOC).
Ang Philippine Coast Guard, Armed Forces of the Philippines, ug uban pang adunay kalabutan nga maritime agencies magpadayon nga lig-on sa pagpanalipod sa mga mananagat nga mga Pilipino ug sa pagbarug sa soberanya, soberanyong katungod, ug hurisdiksyon sa nasud sa West Philippine Sea.
Tungod niini kinahanglan nga ang Pilipinas maghimo og angay nga diplomatikong lakang ug magpadayon sa bilateral nga dayalogo aron matubag kining mga insidente ug kabalaka.
Gisubli usab sa nasud ang panawagan sa Tsina nga bawi-on ug mandoan ang ilahang mga barko ug maritime assets nga hunongon na ang ilegal, pagpanghasi, ug delikadong mga aksyon batok sa mga barko sa Pilipinas, ug undangon ang mga kalihokan nga nakalapas sa soberanya, katungod sa nasud, ug hurisdiksyon sa Pilipinas; ug tumanon ang ilahang mga obligasyon ubos sa internasyonal nga balaod.
Gipasalig sa National Maritime Council ang ilahang ilahang pakigbisog sa malinawon, legal, ug prinsipyadong pamaagi sa pagpanalipod sa interes sa kadagatan sa nasud sa West Philippine Sea.
