Gipahayag ni aktres Angel Locsin ang iyang mainiton nga reaksyon batok kang Senador Robin Padilla human kini miingon nga iyang giila ang kaugalingon isip usa ka “komunista” atol sa impeachment trial ni Bise Presidente Sara Duterte.
Sumala pa ni Locsin sa iyang taas nga mensahe sa social media, nahinumdoman niya ang panahon nga suod pa sila ni Padilla ug ang mga istorya niini kabahin sa iyang giingong kasinatian sa pakigbisog ug pag-apil sa armadong kalihukan. Dugang pa niini, giingon sa aktres nga nahinumdoman niya ang “kanhing Robin Padilla” nga iyang nailhan tungod sa mga pahayag sa senador.
Gikuwestiyon usab ni Locsin ang pagpahilom kuno ni Padilla sa dihang gi-red tag siya sa miaging mga tuig, bisan pa nga wala kuno kini basihi. Lakip sa iyang gipangutana ang giingong suporta sa senador kang Pastor Apollo Quiboloy nga nag-atubang og mga kaso, ingon man ang posisyon niini kabahin sa China nga giingon niyang lahi sa iyang nasayran nga imahe isip makabayan.
Matod pa ni Locsin, kaniadto iyang gidayeg si Padilla tungod sa iyang pagbarog alang sa nasud, apan nadismaya siya sa pipila niini nga mga pahayag. Sa kasamtangan, wala pa maghatag og tubag si Padilla kabahin sa maong mga pahayag ni Locsin.
