Gipahibalo sa Chinese wind turbine manufacturer nga Ming Yang Smart Energy Group ang plano niini nga motabang sa pagpalambo sa offshore wind energy sa Pilipinas, lakip ang pagbutang og mga turbine sa kadagatan nga gidesinyo aron makasugakod sa kusog nga mga bagyo.
Gihisgotan ni Pangulong Ferdinand Marcos Jr. ang maong mga plano uban kang Ming Yang Chairman Zhang Chuanwei atol sa ilang panagtagbo sa Shenzhen, China niadtong Biyernes, Nobyembre 20, sa sidelines sa APEC Economic Leaders’ Meeting.
Sumala sa kompanya, ang ilang teknolohiya sa wind turbine gidesinyo aron makalahutay sa kusog sa mga super typhoon nga molapas sa Category 17, o adunay hangin nga sobra sa 250 kilometros matag oras.
Lakip usab sa ilang gipahibalo nga plano ang pagtukod og Operations and Maintenance Center sa Pilipinas aron dinhi na mapahigayon ang pagmentinar ug pag-ayo sa mga turbine, ingon man ang pagbansay sa mga lokal nga trabahante.
Kahinumdoman nga niadtong Nobyembre 6, mipirma ang Ming Yang ug PetroGreen Energy Corporation og strategic cooperation agreement alang sa pagpalambo sa offshore wind projects sa nasud. Unang tutokan niini ang giplanong 2,000-megawatt Northern Luzon Offshore Wind Project sa Ilocos Norte.
Gilauman nga makatabang ang maong mga paningkamot sa pagpalapad sa renewable energy ug pagpalig-on sa dugayng suplay sa kuryente sa Pilipinas.











