-- ADVERTISEMENT --

Gihagit sa House prosecution team ang kampo ni Vice President Sara Duterte nga direktang motubag sa mga dokumento nga nagpakita kuno og halos P818 milyon nga dili mapatin-aw nga bahandi.

Matod ni Lanao del Sur Rep. Zia Alonto Adiong, gibase ang maong mga nakit-an sa pagsusi sa opisyal nga mga dokumento gikan sa BIR, mga rekord sa bangko, ug mga transaksyon sa mga kompanyang may kalabotan kang Duterte ug sa iyang bana nga si Manases Carpio.

Base sa forensic accounting analysis ni Alexander Cabrera, mokabat sa P817.87 milyon ang giingong dili mapatin-aw nga bahandi ug mga kabtangan nga wala maideklara sa magtiayon gikan sa 2022 hangtod 2025.

Lakip sa gikuwestiyon mao ang wala pagdeklarar og kwarta sa bank accounts sa SALN ni Duterte, bisan pa sa giingong dakong balanse nga nakita sa iyang mga rekord sa bangko.

Matod ni Adiong, dili igo ang mga testimonya sa mga saksi aron mapanghimakak ang mga dokumentong gipresentar sa prosekusyon.

-- ADVERTISEMENT --

Gikatakdang ipadayon ang pagdungog sa impeachment case sa Senado sa Disyembre 1, 2026.

Apan hangtod karon, wala pay pinal nga desisyon ang Senado kon igo ba ang mga ebidensiya aron mapamatud-an ang mga alegasyon batok kang VP Sara Duterte.

“Kung dokumento na ang nagpakita sa kamatuoran, dili na kana basta-basta mamakak,” matod ni Rep. Adiong.