Gidepensahan ni House prosecution spokesperson ug Lanao del Sur 1st District Representative Zia Alonto Adiong ang pagpangutana sa kampo sa prosekusyon kabahin sa tree-planting activities ni Vice President Sara Duterte ug sa posibleng kalambigitan niini sa Cale88 Foods Corporation.
Mitubag si Adiong sa pahayag sa Office of the Vice President o OVP nga makapahisalaag ug walay basihanan ang pagdugtong sa mga kalihokan sa pagtanom og kahoy sa Bise Presidente ngadto sa compliance requirement sa Cale88 sa Board of Investments o BOI.
Matud ni Adiong, kabahin sa katungdanan sa prosekusyon ang pagsusi sa tanang posibleng may kalabotan nga impormasyon aron mapadayag ang tibuok kamatuoran sa impeachment court ug sa publiko.
Kahinumdoman nga atol sa ika-45 nga adlaw sa impeachment trial niadtong Nobyembre 20, gipakita ni private prosecutor Atty. Erwin Matib ang mga litrato ni Duterte samtang nagtanom og kahoy ug gipangutana si DTI Undersecretary Ceferino Rodolfo kon may kalabotan ba kini sa BOI requirement sa Cale88 nga magtanom og labing menos 100 ka forest trees.
Gipatin-aw sa OVP nga lahi ug independente ang ilang “Pagbabago: A Million Trees Campaign” nga gilunsad niadtong Marso 27, 2023 isip suporta sa mga programa sa DENR batok sa climate change.











