-- ADVERTISEMENT --

Gikuwestiyon ni Senador-Judge Erwin Tulfo ang mga pahayag ni Atty. Paolo Panelo, tigpamaba ni Vice President Sara Duterte, nga nagpunting sa pipila ka mga senator-judge ug nagkuwestiyon sa kredibilidad sa mga testigo sa depensa atol sa impeachment trial.

Sa wala pa ipresentar ang offer of testimony sa bag-ong testigo sa depensa nga si Department of Trade and Industry (DTI) Undersecretary Ceferino Rodolfo, gihangyo ni Tulfo nga klarohon kung unsay posibleng aksyon nga mahimo sa impeachment court kalabot sa mga komento ni Panelo.

Matud ni Tulfo, dili kabahin sa aktuwal nga pagtaral si Panelo apan padayon kini sa paghatag og mga komento batok sa mga senador nga nagserbisyo isip mga maghuhukom sa impeachment court.

Gipunting usab ni Tulfo nga daw nagpakita kini og kawalay pagtahod sa impeachment court, ilabina kay ang mga pahayag gikan mismo sa tigpamaba sa Bise Presidente nga giatubang ang impeachment trial.

Kahinumdoman nga kaniadtong Nobyembre 19, 2026 giakusahan ni Panelo ang pipila ka mga senator-judge nga nagpakita kuno og pagpihig batok kang Duterte human kuwestiyonon sa mga senador ang kredibilidad sa testigo sa depensa nga si Atty. Rainer Dela Fuente.

-- ADVERTISEMENT --

Lakip sa espesipikong gihisgotan ni Panelo sila Senators Raffy Tulfo, Francis “Kiko” Pangilinan ug Risa Hontiveros.

Sumala pa ni Panelo, dili trabaho sa mga senator-judge ang pagdaot sa kredibilidad sa mga testigo tungod kay responsibilidad kini sa prosecution panel.