-- ADVERTISEMENT --

Nagpahimangno ang global credit rating agency nga Fitch Ratings sa posibleng pagsaka sa risgo nga maatubang sa mga bangko sa Pilipinas tungod sa plano sa Bangko Sentral ng Pilipinas (BSP) nga paluagan ang mga lagda sa kapital nga gikinahanglan alang sa pagpautang sa pipila ka sektor.

Lakip sa mga sektor nga posibleng maapektuhan niini ang mga konsumidor, gagmayng negosyo,ug Local Government Units (LGUs).

Sumala sa Fitch Ratings, makatabang ang maong lakang sa mga bangko nga makapagawas og dugang kapital nga magamit sa paghatag og pautang ug pagpadako sa ilang kita.

Subay sa ilang pagsusi, posibleng mosaka hangtod sa 2.1 percentage points ang Common Equity Tier 1 o CET1 capital ratio sa mga pribadong bangko sa Pilipinas nga ilang gibantayan kon ipatuman sa BSP ang gisugyot nga polisiya.

Posibleng mosaka usab og hangtod sa 2.9 percentage points ang capital ratio sa mga bangkong gipanag-iya sa gobyerno tungod sa pagpaubos sa risk weights sa mga pautang ngadto sa LGUs.

-- ADVERTISEMENT --

Apan gipahimangnoan sa Fitch nga ang pagdugang sa pautang ngadto sa mga sektor nga adunay mas taas nga risgo mahimong makapataas sa posibilidad nga dili mabayran ang mga utang, nga posibleng makaapekto sa kalidad ug kalig-on sa mga pautang sa mga bangko.

Gilauman usab sa ahensya nga motubo sa 12 ngadto sa 13 porsiyento ang loan portfolios sa mga lokal nga bangkong ilang gibantayan sa 2027, ilabina kon moarang-arang ang kahimtang sa ekonomiya.

Dugang pa, posibleng maapektuhan ang pinansyal nga kalig-on sa mga bangko kung magpadayon ang pagdaghan sa mga high-risk ug unsecured consumer loans, ilabina kon mokunhod usab ang ilang pondo nga magsilbing panalipod batok sa posibleng pagkalugi.