-- ADVERTISEMENT --

Naangol ang duha ka Pilipinong marinero human giatake sa giingong drone ang usa ka barko nga naglayag sa Black Sea, samtang malampusong giluwas sa militar sa Bulgaria ang tanang 19 ka Pilipinong tripulante.

Gikumpirma ni Department of Migrant Workers (DMW) Secretary Hans Leo Cacdac nga luwas na ang mga marinero ug temporaryong nagpuyo sa usa ka hotel sa Bulgaria.

Matud ni Cacdac, gibisita na sa Philippine labor attaché ang mga tripulante, samtang nakig-alayon usab ang ilang lisensiyadong manning agency ug ang tag-iya sa barko aron masiguro ang ilang panginahanglan.

Gipahibalo na usab ang mga pamilya sa kahimtang sa mga marinero ug gihatagan sila og pagkaon, tubig, hygiene supplies ug uban pang batakang panginahanglanon.

Sa pagkakaron, gihikay na sa DMW ang pagpauli sa mga tripulante sa Pilipinas, subay sa gikinahanglang medical examination ug clearance gikan sa mga otoridad sa Bulgaria.

-- ADVERTISEMENT --

Base sa taho, ang Liberian-flagged liquefied petroleum gas tanker nga Gas Husky giatake kaniadtong Martes, Nobyembre 18, 2026 samtang nagdala og mokabat sa 3,400 metric tons nga liquefied petroleum gas gikan sa Egypt padulong sa Romania.

Gipahayag usab ni Cacdac nga gipalihok sa DMW ang pagsusi kon ang habagatan-kasadpang bahin sa Black Sea angay nang ilakip sa high-risk o warlike zone tungod sa nagkadaghang pag-atake sa mga barkong komersiyal.

Samtang, wala pa matino sa mga otoridad kung kinsa ang responsable sa maong pag-atake.