Mogahin ang Estados Unidos og $400 milyon o tugbang sa ₱25.53 billion aron mapalig-on ang kapasidad sa militar sa Pilipinas sa pagpanalipod sa kadagatan ug pagpugong sa posibleng hulga sa seguridad sa South China Sea.
Gipahibalo kini sa White House kaniadtong Miyerkules,Nobyembre 18, 2026 human sa state visit ni US President Donald Trump sa Pilipinas, diin nakigpulong usab kini sa mga lider sa Association of Southeast Asian Nations o ASEAN.
Matud sa White House, gamiton ang bahin sa maong pondo alang sa pagpalambo sa long-range firepower, command-and-control systems, importanteng imprastraktura ug mga drone nga mahimong magamit sa nagkadaiyang operasyon sa militar.
Gawas niini, gipahibalo usab nga paningkamotan sa Estados Unidos ug Pilipinas ang pagpatuman sa Foreign Military Financing o FMF loan package nga mokabat sa kapin $2 bilyon aron makakuha ang nasud og mga kagamitan ug teknolohiya alang sa depensa ug seguridad gikan sa mga kompanyang Amerikano.
Lakip usab sa gipahibalo ang modernisasyon sa Basco Airport sa Batanes aron mapalambo ang operasyon sa militar, pagtubag sa mga kalamidad ug suplay sa mga produkto sa pinakahilagang bahin sa Pilipinas.
Nahisubay ang maong lakang sa nagpadayon nga tensiyon tali sa Pilipinas ug China tungod sa ilang nagkasumpaking pag-angkon sa mga teritoryo sa South China Sea, lakip na ang West Philippine Sea.
Kahinumdoman nga ang Pilipinas ug Estados Unidos adunay dugay nang Mutual Defense Treaty nga naglatid sa ilang panag-alayon sa pagpanalipod batok sa mga hulga sa seguridad.











