-- ADVERTISEMENT --

Gikuwestiyon ni Atty. Paolo Panelo, tigpamaba ni Vice President Sara Duterte, ang mga pangutana sa pipila ka senador-judge kalabot sa kredibilidad sa mga saksi sa defense team sa impeachment trial batok sa Bise Presidente niadtong Huwebes, Nobyembre 19, 2026.

Matud ni Panelo, dili na kuno trabaho sa mga senador-judges ang pagsusi o pagkuwestiyon sa kredibilidad sa mga saksi tungod kay responsibilidad kini sa prosecution panel. Angay lamang paminawon sa mga senador ang mga ebidensiya ug ang mga argumento sa duha ka kampo.

Partikular niyang gipunting ang mga pangutana nila Senators Raffy Tulfo, Francis “Kiko” Pangilinan ug Risa Hontiveros ngadto sa defense witness nga si Atty. Rainer Dela Fuente, lakip na ang mga isyu kalabot sa Philippine Offshore Gaming Operators o POGO, pagpili sa mga botante ug mga kanhing kliyente sa law firm nga kauban niini.

Tungod niini, gihangyo ni Panelo si Senate President ug Presiding Officer Francis “Chiz” Escudero nga pahinumdoman ang iyang mga kaubang senador sa pagpakita og pagpugong sa ilang pagpangutana aron malikayan ang impresyon nga mipabor sila sa usa ka kampo.

Gibutyag usab ni Panelo nga sa iyang obserbasyon, daw naglihok na kuno isip mga abogado sa prosecution ang pipila ka senador-judges. Apan giklaro niya nga personal niyang panglantaw ang maong pahayag ug dili kini angay ipasabot nga mao usab ang opisyal nga posisyon ni Vice President Duterte.

-- ADVERTISEMENT --