-- ADVERTISEMENT --

Mipirma og bag-ong Defense Cooperation Arrangement (DCA) ang Pilipinas ug Australia nga nagtumong sa pagpalig-on sa kooperasyon sa depensa sa duha ka nasud, lakip na ang mas paspas nga koordinasyon sa mga kalihokan militar ug pagtubag sa mga kalamidad.

Gipamatud-an nila Defense Secretary Gilberto Teodoro Jr. ug Australian Ambassador to the Philippines Marc Innes-Brown ang maong kasabutan niadtong Domingo, Nobyembre 15, sa Eva Macapagal Cruise Terminal sa Manila South Harbor.

Nasaksihan usab ang pagpirma sa kasabutan ni Australian Prime Minister Anthony Albanese nga anaa sa Pilipinas alang sa 49th ASEAN Summit.

Gipasabot ni Teodoro nga pangunang tumong sa bag-ong kasabutan ang pagpasimple sa mga proseso ubos sa Philippines-Australia Status of Visiting Forces Agreement (SOVFA) aron mapadali ang koordinasyon ug pagpahigayon sa mga kalihokan militar sa duha ka nasud.

Matud pa niya, imbis nga moagi pa sa daghang lakang aron mapahigayon ang usa ka kalihokan, gilauman nga mas simple ug mas paspas na ang proseso.

-- ADVERTISEMENT --

Lakip sa sakop sa kasabutan ang dugang nga hiniusang kalihokan sa kadagatan, kahanginan ug yuta, ingon man ang mga military exercises, pagpaambitay og impormasyon ug pagpalig-on sa kapasidad sa ilang mga pwersang militar.

Usa usab sa gipasiugda ni Teodoro ang kaayohan niini panahon sa mga kalamidad.

Sumala sa kalihim, maminusan ang mga gikinahanglang permit ug proseso aron mas paspas nga makatubag ang mga pwersa sa Australia kung manginahanglan og tabang ang Pilipinas.

Mapasayon usab ang koordinasyon sa pagkuha o pagpalit og mga kagamitan militar ug pagpahigayon sa mga pagbansay tali sa duha ka nasud.

Gilauman usab nga makatabang ang mas lig-on nga kooperasyon sa pagpalambo sa kapasidad sa Pilipinas sa pagbantay sa kadagatan ug pagpanalipod sa mga lugar nga sakop sa hurisdiksyon niini.

Gipasiugda usab ni Teodoro nga makatabang ang kasabutan sa pagpalig-on sa credible deterrence posture sa nasud, ilabi na sa West Philippine Sea.

Samtang, kabahin usab sa mas halapad nga kooperasyon sa Pilipinas ug Australia ang pagpalig-on sa maritime domain awareness, pagpaambitay og impormasyon, pagbansay ug interoperability sa ilang mga pwersang pangdepensa.

Giklaro nga lahi ang bag-ong DCA sa Enhanced Defense Cooperation Agreement (EDCA) tali sa Pilipinas ug Estados Unidos. Hinuon, magsilbi kini nga mekanismo aron mas hapsay ug paspas nga mapatuman ang kasamtangang kasabutan sa pagbisita ug pagpahigayon og mga kalihokan militar sa Pilipinas ug Australia.

Ang bag-ong kasabutan nagpadayon sa tulo ka dekadang relasyon sa depensa sa duha ka nasud sukad sa pagpirma sa ilang unang memorandum of understanding niadtong 1995.