-- ADVERTISEMENT --

Giawhag sa Department of Agriculture – Philippine Rice Research Institute (DA-PhilRice) ang katawhan nga aktibong moapil sa pagpalig-on sa industriya sa humay ug bugas sa nasud isip kabahin sa pagsaulog sa National Rice Awareness Month nga gipahigayon sa Rizal Park, Manila.

Matod ni DA-PhilRice Los Baños Director Rhemilyn Z. Relado-Sevilla, dili lamang nag-agad sa kadaghan sa ani sa mga mag-uuma ang seguridad sa pagkaon sa nasud, kondili apil usab ang responsable nga pagkonsumo sa mga konsumidor.

Gipasiugda niya nga makatabang sa pagsiguro sa igong suplay sa bugas ang paglikay sa pag-usik sa kan-on, pagpalit sa lokal nga bugas ug pagpili sa masustansyang klase niini.

Lakip usab sa gipaila atol sa programa ang nagkalainlaing alternatibong masustansyang bugas sama sa brown, black, red, low-glycemic ug high-zinc rice, ubos sa pagpanguna ni OIC Deputy Executive Director Henry Corpuz, isip lakang sa pagtubag sa mga isyu kalabot sa nutrisyon.

Nahimong usa sa mga highlight sa ika-24 nga Ceremonial Rice Harvesting ang 300-square-meter Rice Garden diin gihatagan og higayon ang mga estudyante ug mga residente sa siyudad nga makasinati sa tradisyonal nga pamaagi sa pag-ani sa humay kauban ang nagkalainlaing partner agencies.

-- ADVERTISEMENT --

Gipasabot pa sa ahensya nga ang pagpalambo sa industriya sa humay ug pagsiguro sa seguridad sa pagkaon dili lamang responsibilidad sa mga mag-uuma, hinunoa nagkinahanglan usab kini sa maampingong paggamit ug pagkonsumo sa matag konsumidor sa matag lugas sa bugas.