-- ADVERTISEMENT --

Gilusad sa Department of Energy (DOE) ning Nobyembre 2026 ang DOE WataWATT Automation Project, usa ka digital transformation initiative nga naggamit sa artificial intelligence o AI aron mapadali ug mapauswag ang mga serbisyo sa gobyerno.

Gipangulohan kini ni Supervising Undersecretary ug concurrent Information Technology and Management Services (ITMS) Director Maria Francesca M. Del Rosario.

Pinaagi sa maong proyekto, awtomatiko nang ipahigayon ang pagsusi sa mga dokumento, pagproseso sa mga transaksyon ug digital approvals, lakip ang pagtipig sa impormasyon sa usa ka sentralisadong sistema aron malikayan ang manual nga proseso ug paglangan.

Una nga ipatuman ang pagpauswag sa Energy Virtual One-Stop Shop o EVOSS, ang online portal alang sa pag-file ug pagmonitor sa mga permit sa power generation, transmission ug distribution, sa dili pa hinay-hinay nga i-integrate ang laing 12 ka sistema sa DOE.

Kabahin usab kini sa mas lapad nga paningkamot sa ahensya nga mapalambo ang paggamit sa AI ug masunod ang Ease of Doing Business Act ug E-Governance Act.

-- ADVERTISEMENT --

Tumong sa WataWATT nga mapalig-on ang transparency, accountability ug episyenteng paghatag og serbisyo sa sektor sa enerhiya ug sa publiko.