-- ADVERTISEMENT --

Gipasiugda ni Pangulong Ferdinand Marcos Jr. ang pagpalig-on sa kooperasyon sa mga nasod sa ASEAN aron masiguro ang lig-on ug kasaligan nga suplay sa enerhiya, lakip na ang pagtabang nga mapabiling makaya ang presyo sa lana, kuryente ug pagkaon.

Atol sa Leaders’ Retreat sa ika-49 nga ASEAN Summit, gihisgutan sa Pangulo ang pagpalapad sa koneksyon sa enerhiya tali sa mga nasod, pagpangita og alternatibong tinubdan sa enerhiya ug pagpadali sa paggamit sa renewable energy.

Matud ni Marcos, direktang maapektuhan sa pagsaka sa presyo sa lana ug kuryente ang gasto sa pagkaon, operasyon sa mga negosyo ug panginabuhian sa mga Pilipino.

Lakip usab sa giduso sa Pilipinas ang ASEAN Power Grid, usa ka inisyatibo nga nagtumong sa pagkonektar sa mga sistema sa kuryente sa mga nasod sa rehiyon aron mas mapaambit ang suplay ug mapalig-on ang seguridad sa enerhiya.

Pinaagi niini, gilauman nga mas mapalig-on ang kapasidad sa rehiyon sa pag-atubang sa mga hagit sa suplay ug presyo sa enerhiya.

-- ADVERTISEMENT --