Nagtuo ang House prosecution panel nga panahon na aron masayran sa publiko ang mahimong sangpotanan sa impeachment proceedings batok kang Vice President Sara Duterte, human sa pipila ka tuig nga imbestigasyon ug mga proseso nga gihimo sa Kongreso kalabot sa mga alegasyon batok sa Bise Presidente.
Sa press briefing niadtong Biyernes, Nobyembre 13, gipahayag ni House lead prosecutor ug Batangas Representative Gerville Luistro nga angay nang masaksihan sa publiko ang mahimong resulta sa impeachment trial. Sumala kang Luistro, dugay nang nagsubay ang katawhan sa mga imbestigasyon ug pagdungog kalabot sa mga alegasyon batok kang Duterte, busa panahon na aron mahatagan og klarong kataposan ang maong proseso.
Gipasiugda usab sa mambabalaud nga dili lamang ang duha ka nag-atbang nga kampo ang angay makahibalo sa resulta sa pagtaral, kondili lakip na ang katawhang Pilipino nga dugay nang nagpaabot sa kahingpitan sa maong kaso.
Matod pa ni Luistro, angay nga adunay kataposan ang proseso human sa daghang tuig nga imbestigasyon sa Kongreso ug impeachment proceedings, ug panahon na aron tugotan ang publiko nga makasaksi sa resulta niini.
Kahinumduman nga una nang gipahayag ni Luistro nga gitinguha sa House prosecution panel nga makabaton og desisyon ang Senate Impeachment Court sa dili pa ang Pasko, bisan unsa pa ang mahimong sangpotanan sa kaso.
Sa pagkakaron, nakasentro na lamang ang pagtaral sa Article II sa impeachment complaint nga naghisgot sa giingong dili mapatin-aw nga bahandi, kapakyasan sa pagdeklarar sa mga kabtangan ug kapakyasan sa pagbiya sa mga interes sa negosyo ni Duterte.
Sa kasamtanagn gikatakdang ipadayon ang impeachment trial sa Nobyembre 19 human ang temporaryong paghunong sa mga pagdungog tungod sa pag-host sa Pilipinas sa ASEAN Summit.
