Gipahimangnoan sa Davao City Water District (DCWD) ang publiko batok sa mga indibidwal nga nagpakaaron-ingnon nga representante sa ahensya ug nangayo og kwarta baylo sa pabor kalabot sa procurement contracts ug mga serbisyo niini.
Gikondena sa DCWD ang maong ilegal nga kalihokan ug giklaro nga wala kini labot o partisipasyon sa maong pagpangilad. Gisusi na usab sa ahensya ang mga report ug mohimo og angay nga aksyon batok sa mga responsable.
Gipahinumdoman usab ang mga bidder nga ang pahibalo kon nakadaog o wala sa bidding ipahigayon lamang pinaagi sa pormal nga sulat gikan sa Bids and Awards Committee (BAC) Secretariat, subay sa Republic Act No. 12009 o New Government Procurement Act.
Busa, dili angay motagad sa mga tawag o mensahe gikan sa mga indibidwal nga dili mapamatud-ang awtorisado sa DCWD. Gidasig usab ang publiko nga susihon una ang pagkatinuod sa mga sulat ug mensahe nga nangayo og kwarta o donasyon gamit ang ngalan sa ahensya. Gipasiugda sa DCWD nga ang tanang opisyal nga transaksyon, ilabina ang pagbayad, kinahanglan personal nga himoon sa ilang mga opisina.
Gipahinumdoman sa ahensya ang publiko nga magmatngon ug dili dayon motuman sa mga hangyo nga naggamit sa ngalan sa DCWD nga walay hustong pag-verify. Alang sa kumpirmasyon sa mga transaksyon, mahimong direktang mokontak sa opisyal nga mga opisina sa water district.
