Gipadayag ni Justice Secretary Fredderick Vida nga legal ang ₱50 milyones nga ganti nga gitanyag sa gobyerno alang sa bisan kinsang makahatag og impormasyon nga mosangpot sa pagdakop kang Senador Ronald “Bato” dela Rosa.
Matod ni Vida, mahimong kuhaan ang maong kantidad sa pondo alang sa confidential activities ug gitumong kini aron masuta ang nahimutangan sa senador nga gipangita tungod sa warrant of arrest gikan sa International Criminal Court (ICC).
Gikumpirma usab ni Vida nga nagpabilin ang iyang mando sa National Bureau of Investigation nga ipatuman ang maong warrant.
May kalabotan niini, gisiguro usab ni Davao del Sur Governor Yvonne Roña Cagas kang Vida nga wala nahimong tagoanan sa senador ang ilang probinsya ug dili sila mohatag og proteksyon aron itago kini. Dugang pa sa kalihim, nakasiguro siya nga wala gayud sa Davao del Sur si Dela Rosa.
Sa laing bahin, giingon ni ICC-accredited lawyer Gilbert Andres nga mahimong malinawon ang pagdakop sa senador, sama sa nahitabo kang kanhi Pangulong Rodrigo Duterte.
Gihagit niya ang DOJ,NBI, DILG,ug PNP nga epektibong ipatuman ang warrant subay sa Republic Act No. 9851.
Si Dela Rosa giila isip co-perpetrator ni kanhi Pangulo Rodrigo Duterte sa kasong crimes against humanity nga giatubang sa ICC.
