Mipasalig si House Prosecutor Rep. Terry Ridon nga andam ang tibuok House Prosecution Panel sa pagpahigayon og cross-examination sa tanang saksi nga ipresentar sa kampo sa depensa sa pagbalik sa impeachment trial ni Vice President Sara Duterte karong Nobyembre 9, 2026.
Matod ni Ridon, kinahanglan nga mapasabot sa kampo sa Bise Presidente ang giingong ₱800 milyon hangtod ₱1.5 bilyon nga unexplained wealth, lakip ang kapin ₱100 milyon nga sulod sa mga pinansyal nga account nga wala kuno nalakip sa iyang Statement of Assets, Liabilities and Net Worth o SALN.
Gusto usab sa prosecution nga maklaro ang kapin ₱200,000 nga mga transaksiyon gamit ang credit card nga giingong gigamit sa pagkaon sa gawas ug pagpamalit og sapatos ug mga bag. Apan, midumili si Ridon sa paghingalan kung kinsa sa ilang grupo ang motubag sa mga saksi pinaagi sa cross-examination.
Pasiugda usab sa magbabalaod nga dili angay ipasa sa Bise Presidente ngadto sa iyang mga kawani ang responsibilidad sa mga sayop sa iyang SALN, tungod kay isip usa ka abogado, nasayod kini sa legal nga epekto sa pagpirma sa usa ka dokumentong gipamatud-an sa notaryo. Kalabot kini sa gibanabanang ₱817.87 milyon nga giingong dili maipatin-aw nga bahandi nila sa iyang bana nga si Atty. Manases Carpio.
Samtang, gipahibalo ni prosecution legal spokesperson Atty. Benjamin Tolosa Jr. nga andam usab ang tanang public ug private prosecutors sa pagpadayon sa pagtaral.
Gipunting niini nga mas maayo kung ang Bise Presidente mismo ang motestigo aron personal niyang matubag ug mapasabot ang mga alegasyon batok kaniya, nga iyang gipanghimakak.
