Giduso ni Parañaque 2nd District Representative Brian Yamsuan ang usa ka panukala nga nagtumong sa pagpalig-on sa pagtudlo sa arts sa junior ug senior high school aron mapalambo ang talento sa mga batan-ong Pilipino ug mahimong usa sa mga nag-unang tinubdan sa pag-uswag sa ekonomiya ang creative industry sa nasud.
Sumala kang Yamsuan, dako ang potensiyal sa sektor sa sining ug creative industry nga molambo pinaagi sa digital platforms, makamugna og dugang trabaho ug makapataas sa kita sa nasud pinaagi sa pag-eksport sa mga produktong malikhain.
Ubos sa House Bill 7864, tumong nga palapdan ug bag-ohon ang Special Program for the Creative Arts o SPCA sa Department of Education (DepEd).
Lakip sa mga bag-ong asignaturang gisugyot nga idugang ang arkitektura, pelikula, disenyo, digital fabrication ug new media, dugang sa creative writing, visual arts, musika, sayaw ug teatro.
Matod ni Yamsuan, makatabang ang maong programa sa pagpalambo sa talento sa mga estudyante ug pag-andam kanila nga mahimong mga animator, designer, filmmaker, musikero ug uban pang hanas nga mamumuo nga makigkompetensiya sa internasyonal nga industriya.
Lakip usab sa panukala ang pagtudlo sa financial literacy, entrepreneurship ug intellectual property rights. Itukod usab ang SPCA Council nga magsumpay sa mga eskwelahan ug creative industries pinaagi sa mentorship, pagbansay sa mga kompanya, scholarship ug mga oportunidad sa trabaho.
Maglangkob sa maong konseho ang mga representante gikan sa DepEd, National Commission for Culture and the Arts, Department of Trade and Industry, Cultural Center of the Philippines ug uban pang ahensiyang may kalabotan sa edukasyon ug creative industry.
Gisugyot usab sa panukala ang pagkuha og mga espesyal nga magtutudlo ug eksperto, pakigtambayayong sa pribadong sektor alang sa pagbansay sa mga estudyante, ug paghatag og tax exemption sa mga donasyon ug grant alang sa programa.
Dugang pa niini, gisugyot ang tax incentives sa pag-angkat sa mga kagamitan nga gikinahanglan sa creative industry ug wala ginahimo sulod sa nasud.
