Gikansela ni Ombudsman Jesus Crispin Remulla ang iyang gikatakdang pagbiyahe sa France karong Nobyembre 17, 2026 gumikan sa nagpadayong mga protesta ug kagubot sa maong nasud.
Matod ni Remulla, makigpulong unta siya sa mga opisyal sa France aron mangayo og tabang sa pagpangita sa pipila ka dagkong opisyal sa Pilipinas nga giingong nagtago didto.
Kaniadtong Septiyembre, gipahibalo ni Remulla ang iyang plano nga pangitaon didto si kanhi Ako Bicol Party-list Representative Zaldy Co, Senator Loren Legarda ug ang anak niini nga si Batangas Representative Leandro Leviste.
Base sa impormasyon sa Ombudsman, anaa sa France si Co ug nangayo kuno og asylum. Sukad 2025, wala na kini makabalik sa Pilipinas ug giisip nga pugante sa balaod tungod sa mga kasong graft ug malversation nga iyang giatubang sa Sandiganbayan. Nalambigit kini sa giingong iregularidad ug conflict of interest sa ₱299.4-milyong flood control project sa Naujan, Oriental Mindoro.
Samtang, migawas sa nasud si Legarda niadtong Agosto 2 human ibutyag sa Ombudsman nga giimbestigahan siya kalabot sa giingong kapakyasan sa solar power company nga gipanag-iya sa iyang anak sa pagtuman sa kontrata sa gobyerno.
Tungod niini, gipalugway pa sa senador ang iyang medical leave ug wala na makatambong sa impeachment trial ni Vice President Sara Duterte.
