Nasamdan ang kapin 22 ka tawo human miigo ang magnitude 5.7 nga linog sa Shizuoka Prefecture sa Central Japan sayong kabuntagon karung adlawang Dominggo, Nobyembre 8, 2026.
Sumala sa Japan Meteorological Agency (JMA), miabot sa upper 5 ang intensity sa Chita City, Aichi Prefecture, samtang wala nayong tsunami warning human sa linog. Gibanabana nga 41 kilometros ang giladmon sa sentro niini sa kasadpang bahin sa Shizuoka.
Kadaghanan sa mga nasamdan natumba samtang naningkamot sa pag-ikyas o naigo sa mga nangahulog nga debris. Lakip kanila ang usa ka babaye nga nabali ang bukong-bukong ug duha ka tawo nga naangol sa ulo.
Naapektuhan usab ang suplay sa tubig sa pipila ka bahin sa Higashiura Town, Aichi, samtang adunay mga nabuak nga bildo ug nangahulog nga mga butang sa mga establisyimento. Temporaryong gipahinay ang dagan sa Tokaido Shinkansen bullet trains samtang gisusi ang mga riles. Wala usab nakit-an nga abnormalidad sa Hamaoka Nuclear Power Plant.
Matod sa JMA, ubos ang posibilidad nga direktang konektado ang linog sa posibleng Nankai Trough megaquake. Bisan pa niini, giawhag ang mga residente nga magbantay sa posibleng kusog nga aftershocks sulod sa sunod nga usa ka semana ug sa peligro sa pagdahili sa yuta, ilabi na kon moulan.
