Giklaro ni United States Ambassador to the Philippines Lee Lipton nga walay hisgotan o pirmahan nga kasabotan kabahin sa Pax Silica Economic Security Zone atol o human sa ASEAN Leaders’ Summit nga ipahigayon sa Pilipinas karong Nobyembre 15 hangtod 17 ning tuiga.
Sa iyang opisyal nga pahayag kaniadtong Sabado, Nobyembre 8, gipanghimakak ni Lipton ang mga taho nga adunay ipahibalo kabahin sa maong proyekto atol sa meeting nila ni Presidente Ferdinand Marcos Jr. ug US President Donald Trump sa sidelines sa summit.
Sumala pa ni Lipton, kinahanglan una ang masusing konsultasyon tali sa Estados Unidos ug sa gobyerno sa Pilipinas ayha maghimo og desisyon kabahin sa proyekto. Lakip sa ilang hisgutan ang posibleng epekto niini sa tanang sektor nga maapektuhan.
Dugang pa niini, nagkanayon usab si Philippine Ambassador to the United States Jose Manuel Romualdez nga dili pa lagmit mahuman ang negosasyon sa Pax Silica sa panahon sa ASEAN Summit tungod kay nagpadayon pa ang mga panaghisgot.
Kahinumdoman nga gipadayag kaniadto ang plano sa pagtukod og kapin 1,600-ektaryang AI data center sa Capas, Tarlac ubos sa inisyatibo sa Estados Unidos nga Pax Silica.
Apan nakadawat kini og nagkalainlaing reaksyon ug pagsupak, ilabi na gikan sa mga progresibong grupo ug sa komunidad sa mga Aeta sa Capas, nga gikabalak-an ang posibleng epekto sa maong proyekto sa ilang komunidad.
