Gipahibalo sa Department of Budget and Management o DBM nga dungan nga madawat sa mga kwalipikadong kawani sa gobyerno ang ilang Year-End Bonus ug P5,000 nga cash gift kauban sa unang sweldo karong Nobyembre.
Gipagawas na sa DBM ang kinatibuk-ang P82.998 bilyong pondo alang sa year-end benefits sa mga kwalipikadong sibilyan, militar ug uniformed personnel.
Gimandoan usab sa ahensya ang tanang departamento ug opisina sa gobyerno nga dili langanon ang paghatag sa mga benepisyo pinaagi sa bulag o ulahing payroll.
Subay sa DBM Budget Circular No. 2024-3, katumbas sa usa ka bulan nga basic salary hangtod Oktubre 31, 2026 ang madawat nga Year-End Bonus, dugang ang P5,000 nga cash gift.
Matud ni Budget Secretary Kim Robert de Leon, dako kini nga tabang sa mga kawani sa gobyerno ug ilang pamilya, ilabina nga nagkaduol na ang Pasko.
Dugang pa sa kalihim, usa usab kini ka pag-ila ug pagpasalamat sa ilang kakugi, dedikasyon ug padayong pagserbisyo sa katawhang Pilipino.
Sa kinatibuk-ang pondo, P73.449 bilyon ang gigahin alang sa Year-End Bonus samtang P9.549 bilyon ang alang sa cash gift.
Aron makadawat sa tibuok benepisyo, gikinahanglan nga nakaserbisyo ang empleyado og labing menos upat ka bulan o 120 ka adlaw gikan Enero 1 hangtod Oktubre 31, 2026, ug anaa pa sa serbisyo sa gobyerno hangtod sa maong petsa.
Sakop niini ang mga empleyadong regular, contractual ug casual sa national ug local government agencies, lakip ang mga naka-awtorisadong leave of absence nga adunay bayad.
Giklaro sa DBM nga ang aktuwal nga petsa sa pagbayad magdepende sa payroll schedule sa matag ahensya, apan kinahanglan nga dungan nga ihatag ang Year-End Bonus ug cash gift uban sa unang sweldo sa Nobyembre.
