Gitakda sa Davao City Council ang one-time payment alang sa mga grave lot sa bag-ong Muslim Cemetery sulod sa Tagakpan Public Cemetery, human maaprobahan sa ikaduhang pagbasa ang may kalabotan nga ordinansa.
P7000 ang bayranan sa matag lote alang sa mga bata, samtang P15,000 ang matag lote alang sa mga hamtong. Sumala sa ordinansa nga gipasiugdahan ni Councilor Ragde Niño Ibuyan Jr., chairman sa Committee on Government Enterprises and Privatization, adunay 70 ka gagmay nga grave lot nga gitagana alang sa mga bata ug 264 ka dagkong lote alang sa mga hamtong.
Gipunting usab nga kini ang pinakaubos nga bayranan kumpara sa unang gisugyot nga rates sa City Economic Enterprises o CEE.
Samtang, dili sakop sa maong bayranan ang mga pamilyang kabos o indigent aron dili madugangan ang ilang pinansyal nga kabug-at sa panahon sa pagpanamilit sa ilang namatay nga minahal.
