Gipakusgan sa National Capital Region Police Office (NCRPO) ang pagpangandam alang sa seguridad sa 49th ASEAN Summit and Related Summits nga ipahigayon sa Metro Manila gikan Nobyembre 16 hangtod 18, 2026.
Sumala kang NCRPO Officer-in-Charge Brig. Gen. Christopher Abrahano, liboan ka pulis ang ipakatap aron maghatag og seguridad sa mga lider sa nagkadaiyang nasud ug mga bisitang motambong sa maong panagtigom.
Gawas sa seguridad, motabang usab ang NCRPO sa pagdumala sa dagan sa trapiko aron malikayan ang mga aberya sa pagbiyahe sa mga delegado.
Lakip sa mga lugar nga tutokan sa seguridad ang mga venue sa summit, mga hotel, tugpahanan, dagkong kalsada ug mga transport hub nga agianan sa mga delegado.
Matag adlaw usab nga ginarepaso ug giusab sa kapulisan ang ilang mga plano aron mas mapalig-on ang seguridad sa mga lugar nga ipahiayon ang maong panagtigom.
Kabahin sa pagpangandam ang koordinasyon sa Armed Forces of the Philippines (AFP), Metropolitan Manila Development Authority (MMDA), Department of Tourism ug Department of the Interior and Local Government (DILG) alang sa pagdumala sa trapiko, paglihok sa mga convoy ug dali nga pagtubag sa posibleng mga insidente.
Apil sa mga gilauman nga motambong sa summit si United States President Donald Trump.
Tumong sa maong pagpangandam nga masiguro ang kaluwasan ug kahapsay sa tibuok panagtigom, samtang mamenosan ang posibleng kalangan sa mga motorista ug residente sa Metro Manila.
