Nagpatuman og mga lakang ang Department of Energy (DOE), pinaagi sa Task Force on Energy Resiliency (TFER), aron masiguro ang padayong suplay sa kuryente sa mga kritikal nga pasilidad sama sa mga ospital, health center, pasilidad sa tubig ug food hub.
Kabahin sa koordinasyon sa National Disaster Risk Reduction and Management Council (NDRRMC), hugot nga gipatuman sa DOE ang pagbutang og backup power systems sa mga kritikal nga pasilidad nga makasuporta sa ilang operasyon sulod sa labing menos 72 ka oras bisan walay suplay sa kuryente gikan sa grid.
Gipaspasan usab sa ahensya ang pagkompleto sa mga importanteng power project ubos sa Task Force 200 aron masiguro ang igong suplay sa elektrisidad taliwala sa hulga sa El Niño.
Dugang niini, padayon nga gipasiugdahan sa DOE ang Oras Natin sa Efficiency (O.N.E.) campaign aron awhagon ang publiko sa mas maampingon ug matipid nga paggamit sa kuryente.
Tumong sa maong mga lakang nga malikayan ang dakong pagkaputol sa suplay sa kuryente, mapanalipdan ang mga importanteng serbisyo ug maandam ang mga komunidad sa posibleng epekto sa El Niño.
