Pakusgan sa Department of Transportation (DOTr) ang pagpatuman sa mga lagda sa kaluwasan sa kadagatan aron malikayan ang susamang trahedya sama sa pagkaunlod sa MV June Aster sa Palawan nga miresulta sa kamatayon sa 77 ka tawo.
Sumala kang Transportation Secretary Vince Dizon, gikinahanglan ang mas hugot nga pag-inspeksyon sa mga barko aron masiguro nga angayan ug luwas kini nga makalayag, lakip na ang pagsunod sa gitakdang gidaghanon sa mga pasahero nga mahimong sakay niini.
Mipasalig usab si Dizon nga hisgotan niya kauban ang mga opisyal sa DOTr ug sa mga kaubang ahensya niini ang mga lakang aron mas mapalig-on ang pagpatuman sa mga regulasyon ug mapanubag ang mga kompanya sa barko nga molapas sa mga lagda sa kaluwasan.
Gipasiugda sa kalihim nga kinabuhi sa mga pasahero ang nameligro, busa dili angay ikompromiso ang kaluwasan sa mga barkong nagbiyahe sa nasud.
Samtang, adunay pipila ka kompanya sa barko nga mihunong na sa pagpasakay og mga de-kuryenteng sakyanan o electric vehicles human sa trahedya sa MV June Aster. Apan sumala kang Dizon, hisgotan pa nila ang mga polisiya kalabot sa pagdala niini sulod sa mga barko.
Sa laing bahin, gimandoan dayon ni Transportation Secretary Vince Dizon ang Maritime Industry Authority (MARINA) nga suspindihon ang Passenger Ship Safety Certificate sa MV Virgen de Peñafrancia II human kini mitagilid duol sa Real Port sa Quezon sayong kabuntagon kaniadtong Biyernes, Oktubre 31, 2026.
Tungod niini, dili pa tugotan nga makalayag ang maong barko hangtod nga moagi kini sa masusing inspeksyon sa kaluwasan nga ipahigayon sa MARINA ug makapasar niini.
Nahinumdoman nga giluwas sa Philippine Coast Guard (PCG) ang 40 ka pasahero ug 18 ka tripulante sa barko, lakip ang duha ka masuso.
Malampusong naibakwit ang tanang 58 ka tawo ug walay natalang naangol sa maong insidente.
Gipasalig sa DOTr nga dili niini pasagdan ang bisan unsang paglapas sa mga regulasyon sa kaluwasan sa kadagatan nga mahimong magbutang sa kinabuhi sa mga pasahero sa peligro.
