Nag-apod-apod ang Department of Social Welfare and Development (DSWD) og mga ready to eat meals ug tubig nga mainom ngadto sa mga evacuee sa Albay kaniadtong Biyernes, Oktubre 30,2026 human matala ang usa ka moderately explosive eruption sa Bulkang Mayon.
Sumala sa ahensya, nakaandam kini og 417,886 ka family food packs (FFPs), 14,137 ka kahon sa ready-to-eat food (RTEF) ug 28,366 ka pakete sa mga non-food items (NFIs) aron matubag ang panginahanglan sa mga apektadong residente.
Misunod ang pag-apod-apod sa pagkaon ug uban pang tabang human gimandoan sa lokal nga panggamhanan sa Camalig, Malilipot ug Tabaco City ang mandatory evacuation sa mga panimalay sulod sa unom ka kilometrong Permanent Danger Zone (PDZ), tungod sa pagpataas sa Alert Level 3 sa bulkan.
Gimandoan usab sa DSWD ang Social Welfare and Development (SWAD) Team ug ang Disaster Response Management Division niini nga magpahigayon og profiling sa mga residente nga mipahawa sa ilang mga pinuy-anan tungod sa pag-alburuto sa bulkan.
Samtang, gisuspenso na usab ang klase sa mga apektadong lugar isip lakang aron masiguro ang kaluwasan sa mga estudyante ug magtutudlo.
