Gikuwestiyon ni Caloocan City 2nd District Representative Edgar Erice ang dugang nga ₱4 bilyong pondo alang sa mga proyektong pang-imprastraktura sa Ilocos Norte 1st District, nga girepresentahan ni House Majority Leader Sandro Marcos.
Base sa datos sa budget watchdog nga People’s Budget Coalition (PBC), misaka og ₱4.37 bilyon ang alokasyon sa Ilocos Norte 1st District Engineering Office sa bersyon sa 2027 national budget nga giaprobahan sa House of Representatives, kung itandi sa National Expenditure Program (NEP) nga gisumite sa Department of Budget and Management (DBM). Nalakip sa maong alokasyon ang 405 ka proyektong pang-imprastraktura, sumala sa report.
Gipasiugda ni Erice ang panginahanglan sa patas nga pag-apod-apod sa pondo sa mga distrito ug gikuwestiyon ang dakong alokasyon alang sa maong opisina. Giawhag usab niya ang Senado nga susihon ug tarungon ang mga kuwestiyonableng kausaban o giingong budget insertions sa 2027 national budget.
Samtang, gipahayag ni Palace Press Officer Undersecretary Claire Castro nga dili awtomatikong sayop ang budget insertions basta magamit sa hustong paagi ang pondo ug makabenepisyo ang publiko. Dugang pa niini,kinahanglan masiguro nga walay ghost projects o paggamit og substandard nga materyales sa mga proyektong pondohan sa gobyerno.
Pagpaklaro usab sa report sa PBC nga ang mga kantidad gibase sa alokasyon sa DPWH district engineering offices ug dili direktang pondo nga madawat sa mga kongresista. Busa, ang pagtaas sa alokasyon lamang dili awtomatikong pamatuod sa iregularidad.
