Miabot na sa 16 ka tawo ang namatay human sa pagtay-og sa magnitude 7.0 nga linog sa rehiyon sa Nagqu sa Tibet, China, kaniadtong Huwebes sa gabii, Oktubre 22, 2026.
Sumala sa US Geological Survey o USGS, nahimutang ang episentro sa linog mga 183 kilometros sa sidlakang-amihanan-sidlakan sa siyudad sa Nagqu. Gibanabana nga 10 kilometros ang giladmon sa linog.
Gawas sa mga namatay, adunay usab mga naangol sa maong katalagman, diin ang pipila kanila gikatahong anaa sa kritikal nga kondisyon ug nagpadayon sa pagdawat og medikal nga pag-atiman.
Naguba ang labing menos 339 ka kabalayan ug 20 ka kulungan sa mga hayop tungod sa kusog nga pag-uyog sa yuta. Naapektuhan usab ang suplay sa kuryente ug komunikasyon sa pipila ka apektadong lugar.
Gilayon nga gipakatap sa mga otoridad ang kapin 1,600 ka personnel gikan sa fire department, kapulisan ug militar aron magpahigayon og search and rescue operations. Gigamit usab ang mga espesyal nga kagamitan sa pagpangita sa mga posibleng nalumos o natanggong ilalom sa mga kagun-oban.
Samtang, gisuspinde ang operasyon sa mga tren ug airports sa palibot sa apektadong lugar isip lakang sa pagsiguro sa kaluwasan sa mga pasahero ug personnel.
Gipahimutang na usab sa China Earthquake Administration ang Level II emergency response aron mapadali ang pagresponde sa mga otoridad. Nagpadala ang gobyerno og mga emergency supplies, lakip ang 3,000 ka tolda, folding beds, sinina alang sa bugnaw nga panahon ug 1,000 ka prefabricated housing units alang sa mga pamilyang nawad-an og kapuy-an.
Nagpadayon ang rescue ug relief operations samtang gisusi pa sa mga otoridad ang tibuok kadaot nga gipahinabo sa linog.
