Kabsan sa kinabuhi ang usa ka Overseas Filipino Worker human maigo sa mga tipaka sa drone nga gi-intercept sa air defense sa Saudi Arabia, sumala sa Department of Migrant Workers o DMW kaniadtong Huwebes, Oktubre 22, 2026.
Base sa Saudi Ministry of Energy, misulay og atake ang drone sa pasilidad sa Shaybah oilfield sa Saudi Aramco, apan nasagap kini sa depensa sa Saudi. Ang nangatagak nga debris maoy hinungdan sa pagkamatay sa duha ka residente, usa ka Pilipino ug usa ka Nepali national.
Duha pa ang nasamdan sa maong insidente, nga mga lungsuranon sa Pakistan ug India.
Samtang, padayon nga nagmonitor ang DMW sa mga report sa pag-atake, sa pakigtambayayong sa mga kauban niini ug sa mga awtoridad sa Saudi Arabia aron matino kon aduna pay ubang OFW nga naapektuhan.
Sumala kang DMW Secretary Hans Leo J. Cacdac, nagpaabot pa sila sa dugang nga impormasyon gikan sa ilang mga kauban sa lugar ug naglaom nga walay laing Pilipino nga madamay sa mga pag-atake.
Nanawagan usab ang kalihim sa mga Pilipino nga anaa sa Saudi Arabia ug sa ubang bahin sa Middle East nga mosunod sa mga pahimangno sa lokal nga awtoridad, magpabiling alerto ug kanunay nga mosubay sa opisyal nga mga direktiba.
Gidasig sa DMW ang mga OFW nga likayan ang mga lugar nga posibleng maapektuhan sa mga pag-atake, lakip ang mga instalasyong militar ug oil facilities. Gipahinumdoman usab sila nga susihon una ang flight schedules sa dili pa mobiyahe ug likayan ang pagkuha og litrato o video sa mga insidenteng may kalabotan sa seguridad sa Saudi Arabia.
