Nag-isyu og 40 ka subpoena ang Criminal Investigation and Detection Group sa Philippine National Police atol sa nagpadayong imbestigasyon sa napakyas nga pagsulod sa 521 kilos nga shabu nga nagkantidad og ₱3.5 bilyon gikan Laos gamit ang pribadong eroplano.
Sumala kang CIDG director Maj. Gen. Robert Alexander Morico II, 11 sa mga gipatawag nalakip sa mga person of interest nga una nang giila ni Interior Secretary Jonvic Remulla. Nakigtambayayong usab ang CIDG sa Civil Aviation Authority of the Philippines ug Bureau of Immigration.
Padayon usab ang pagpangita kang Sultan Edrieza Hadji Nasser Rimbang, nga giila ni Remulla nga giingong financier sa operasyon. Matud sa CIDG, mikabat sa ₱11.5 milyon ang pondo nga gipagawas alang sa charter sa eroplano ug uban pang gasto. Lakip niini ang ₱3 milyon nga giingong gitagana isip grease money sa pag-abot sa eroplano sa Pilipinas.
Samtang, gipahawa sa katungdanan ug gibutang sa restrictive custody si Police Master Sgt. Aileen Jayne Manalo Mendoza sa Aviation Security Group, nga giingong nangita og pribadong airline companies alang sa operasyon.
Gilauman sa CIDG nga isumiter ang mga nakalap nga dokumento, testimonya ug CCTV footage ngadto sa PNP chief Gen. Jose Melencio Nartatez Jr. sa Biyernes, Oktubre 22, 2026 sa dili pa kini itugyan sa Philippine Drug Enforcement Agency.
Sa laing bahin, nagpahigayon usab og preliminary briefing ang House Committee on Dangerous Drugs aron susihon ang mga ebidensiya ug posibleng kalambigitan sa Pilipinas sa maong shipment.
