Miangkon si US President Donald Trump nga gipresyur niya ang Ukraine nga undangon ang mga pag-atake niini sa mga oil refinery sa Russia, tungod sa posibleng epekto sa presyo sa lana ug diesel sa mga konsumidor sa Estados Unidos.
Sumala kang Trump, ang pag-atake sa mga pasilidad sa lana sa Russia mahimong makapadugang sa presyur sa presyo sa petrolyo nga direktang makaapekto sa mga Amerikano.
Samtang, gisaway ni Ukrainian President Volodymyr Zelenskyy ang panawagan sa US ug ang giingong kakulang sa lig-on nga pagtubag sa mga pag-atake sa Russia batok sa mga negosyo nga gipanag-iya sa mga Amerikano sa Ukraine.
Gipasiugda ni Zelenskyy nga dili angay undangon lamang ang mga pag-atake sa Ukraine sa mga pasilidad sa enerhiya sa Russia samtang nagpadayon ang mga pag-atake sa Moscow sa imprastraktura sa enerhiya sa Ukraine.
Kahinumdoman nga gipahibalo ni Trump ang iyang pakigsabot kang Russian President Vladimir Putin alang sa pagpagawas sa dugang nga suplay sa lana ug diesel sa Russia, lakip ang gatosan ka libong tonelada, aron matabangan ang pagpaubos sa presyo sa petrolyo sa Estados Unidos.
Sa laing bahin, nagpadayon ang panaglalis bahin sa giingong energy ceasefire o temporaryong paghunong sa mga pag-atake sa imprastraktura sa enerhiya, taliwala sa mga taho nga adunay mga pag-atake nga nagpadayon sa pipila ka lugar.
