Mipasalig ang mga water concessionaires nga andam sila sa pag-atubang sa posibleng epekto sa El Niño sa Pilipinas, lakip na ang hulga sa pagkunhod sa suplay sa tubig tungod sa taas nga temperatura ug kakulang sa ulan.
Lakip sa ilang mga lakang ang padayong pagmonitor sa lebel sa tubig sa mga dam aron masubay ang kahimtang sa suplay ug maandam ang angay nga mga lakang kung mokunhod kini.
Gipadali usab sa mga kompanya ang pagkompleto sa ilang mga proyekto nga naggamit sa Laguna Lake isip alternatibong tinubdan sa tubig aron maminusan ang pagsalig sa mga dam.
Kutob sa mahimo, paningkamotan sa mga water concessionaires nga malikayan ang water interruption. Apan, kung dili malikayan ang kakulang sa suplay, andam silang magpatuman og water rationing aron maapod-apod ang tubig sa mga konsumidor.
Samtang, nagpadayon ang pagpangandam sa gobyerno ug nagkalainlaing ahensiya tungod sa pasidaan sa Philippine Atmospheric, Geophysical and Astronomical Services Administration (PAGASA) nga posibleng molig-on ang El Niño ug moabot sa lebel nga Super El Niño hangtod sa unang katunga sa 2027.
Dugang sa mga proyekto sa alternatibong tinubdan sa tubig, giawhag usab ang publiko nga magtipid sa tubig ug likayan ang pagtipig og sobra-sobra nga suplay tungod lamang sa kahadlok sa posibleng kakulang niini.
