Magpresenta ang prosekusyon sa International Criminal Court o ICC og lima ka testigo sa husay sa kasong crimes against humanity batok kang kanhi Pangulong Rodrigo Duterte sa dili pa ang Christmas recess sa korte.
Sumala ni Senior Trial Lawyer Julian Nicholls, gilauman nga personal nga motestigo sa The Hague ang mga testigong gitaganag protective codes, gawas kon adunay wala damhang problema sa pagpangandam. Mahimo silang mohatag og live testimony o mogamit sa ilang naunang sinulat nga mga pahayag subay sa Rule 68 sa ICC.
Atol sa status conference, gihisgotan usab ang paggamit sa prosekusyon sa open-source materials, lakip ang gibana-banang 1,000 ka clipping sa mga mantalaan bahin sa mga pagpatay sa Davao City panahon nga mayor pa si Duterte.
Gipangutana ni Presiding Judge Joanna Korner kon gikinahanglan ba nga ilakip ang tanang maong balita sa opisyal nga rekord sa husay. Depensa ni Nicholls, importante ang mga dokumento tungod kay gitigom kini sa panahon nga walay opisyal nga ahensiyang sistematikong nagtala sa mga giingong extrajudicial killings.
Dugang pa niya, mahimong adunay kalabotan ang maong mga dokumento sa pagtino sa kahibalo ug kasayoran sa mga opisyal niadtong panahona.
Samtang, gipadayag sa defense team ni Duterte nga milapas na sa 18,000 ka item ang listahan sa ebidensiya, lakip ang usa ka dataset nga adunay 8,393 ka item gikan sa mga operasyon sa Philippine National Police gikan Hulyo 2016 hangtod Nobyembre 2017.
Giawhag sa mga huwes ang prosekusyon nga dugangan pa ang pagpakunhod sa mga nagdobleng dokumento aron mapuntingan sa husay ang mga ebidensiyang may kalabotan sa kaso.
Ang pagpresentar sa mga testigo ug dokumento kabahin sa proseso sa husay ug dili pa nagpasabot nga napamatud-an na ang mga alegasyon batok kang Duterte.
