Gikumpirma sa Trial Chamber III sa International Criminal Court nga adunay kapasidad si kanhi Pangulong Rodrigo Duterte nga motambong sa iyang pagdungog sa korte, human repasohon ang resulta sa mga medical assessment nga gihimo sa mga eksperto.
Sumala sa Chamber, natagbaw kini sa mga pagsusi ug igo ang mga ebidensiya nga ilang nasusi aron matino nga makasalmot si Duterte sa proceedings.
Nagtakda usab ang Chamber og mga paagi aron mapadali ang iyang pag-apil sa pagdungog nga gikatakdang magsugod sa Nobyembre 30, 2026.
Kahinumdoman nga atol sa ikatulong status conference kaniadtong Septiyembre 16,2026 mihangyo ang abogado ni Duterte nga ipahigayon ang dugang medical tests tungod sa ilang pag-angkon nga ang kanhi Pangulo nagpakita og mga timailhan sa pagkunhod sa iyang memorya base sa nangaging mga pagsusi.
Subay sa maong desisyon, gimandoan usab sa Trial Chamber III ang ICC Registry nga mangandam alang sa pagdungog. Lakip sa gisugyot nga paagi ang pag-apil ni Duterte pinaagi sa video conference, kon tugotan sa Chamber, samtang magpabilin ang iyang kahigayonan nga makigsulti sa iyang mga abogado.
Nag-atubang si Duterte og mga kaso sa crimes against humanity nga adunay kalabotan sa kampanya batok sa ilegal nga droga sa panahon nga siya ang Pangulo sa Pilipinas ug mayor sa Davao City. Ang mga alegasyon ipailalom sa proseso sa korte ug dili kini angay isipon nga napamatud-ang sala hangtod adunay kataposang paghukom.
