Gipahayag ni House prosecution legal spokesperson ug counsel Benjamin “Jay” Tolosa Jr. nga mahimong ipaambit sa Senate Impeachment Court ang mga rekord sa Anti-Money Laundering Council o AMLC, tungod kay gitugotan ang ahensya nga magpaambit og impormasyon sa mga foreign financial intelligence unit ug uban pang awtoridad ubos sa pipila ka kondisyon.
Gipasabot ni Tolosa nga kung gitugotan ang AMLC nga magpaambit og impormasyon ngadto sa mga langyaw nga counterpart ug awtoridad, mas dili mahimong ikalimod ang posibilidad nga mahatag usab niini ang mga dokumento ngadto sa Impeachment Court, nga usa ka constitutional institution.
Giinsistir usab niya nga wala’y absolute prohibition sa kasamtangang mga balaod nga makapugong sa Impeachment Court sa pag-isyu og subpoena aron iprisinta ang mga rekord sa AMLC.
Kahinumduman nga niadtong Hulyo, gitugotan sa Senate Impeachment Court ang subpoena alang sa AMLC ug bank records nila Vice President Sara Duterte ug Manases Carpio human makita sa korte nga prima facie relevant and material ang mga dokumento sa mga alegasyon ubos sa Article II.
Sumala usab sa korte, ang Section 8-A sa Anti-Money Laundering Act nagdili sa unauthorized disclosure sa mga AMLC personnel, apan wala niini gitangtang ang subpoena power sa Senado isip Impeachment Court.
Samtang, giila ni Tolosa nga mahimo gihapong supakon sa depensa ang mga rekord kung motestigo na si AMLC Executive Director Ronel Buenaventura ug kung pormal nang ihalad sa prosecution ang maong mga dokumento isip ebidensya.
Gikatakdang moatubang si Buenaventura sa witness stand ugmang adlawa, human hatagan sa Impeachment Court ang depensa og dugang panahon aron masusi ang AMLC records ug maandam ang ilang mga pangutana.
Sa pagkakaron, ang pagdungog kang Buenaventura gilauman nga makatabang sa korte sa pagsusi sa mga financial records ug sa ilang kalabutan sa mga alegasyon nga gilatid sa impeachment case.
