Mosaka og hangtod P18 kada kilo ang presyo sa liquefied petroleum gas o LPG karong Oktubre tungod sa nagpadayong tensyon sa Middle East ug pagsaka sa kontrata ug freight costs.
Sugdan sa Oktubre 3 ang unang P10 kada kilo nga price increase, sundan og P5 sa Oktubre 10 ug P3 sa Oktubre 17, sumala sa LPG Marketers Association.
Alang sa 11-kilogram nga tangke, mahimong mosaka sa hangtod P1,600 ang presyo gikan sa P1,400 human mapatuman ang tulo ka tranches sa increase.
Gipasabot sa LPG industry nga bisan adunay suplay, misaka ang gasto tungod sa pagsira sa Strait of Hormuz, nga nakaapekto sa freight ug pagkuha sa LPG.
Gipangandaman usab sa mga marketer ang posibleng epekto sa desisyon sa China nga pugngan ang export sa finished products, samtang gimandoan sila sa Department of Energy nga mangita og alternatibong source gikan sa ubang nasod.
Pinakaapektado sa pagsaka sa presyo ang gagmayng negosyo sama sa mga carinderia nga nagdepende sa LPG sa pagluto.
Samtang, pipila ka carinderia owners miingon nga dili nila tuyo nga ipasa dayon sa mga kustomer ang dugang gasto pinaagi sa pagpataas sa presyo o pagkunhod sa serving.
