Mipasaka og Petition for Certiorari and Prohibition sa korte suprema si Atty. Ernesto Francisco Jr. aron kuwestiyonon ang desisyon sa Senate Impeachment Court nga nag-usab sa gikinahanglang voting threshold alang sa conviction.
Gipunting ni Francisco nga iyang gikuwestiyon ang deliberasyon ug interpretasyon sa Senado may kalabotan sa pagtakda sa hustong ihap sa boto nga gikinahanglan sa impeachment proceedings.
Gipatin-aw usab niya nga iyang gihimo ang maong lakang isip usa ka lungsoranon ug wala kini, matud pa niya, kalabotan sa bisan unsang politikal nga partido o grupo.
Giinsistir ni Francisco nga ang Supreme Court ang adunay katungod sa paghubad ug pagtino sa tukmang interpretasyon sa probisyon sa konstitusyon may kalabotan sa voting threshold.
Alang kaniya, makahatag og peligro sa proseso kung ang mga pampublikong opisyal mismo, lakip ang mga senador, maoy magbuot sa interpretasyon sa probisyon nga gigamit sa ilang kaugalingong impeachment proceedings.
Tungod niini, gihangyo sa abogado ang korte suprema nga mag-isyu og Status Quo Ante Order aron ibalik ang kahimtang sa wala pa ang kontrobersyal nga pagbag-o sa voting threshold.
Wala niya gihangyo ang pag-isyu og Temporary Restraining Order o TRO, tungod sa iyang posisyon nga ang Lehislatura ug Hudikatura mga co-equal branches sa gobyerno.
Gihangyo usab ni Francisco nga ideklarang null and void o ipawalay-bisa ang deliberasyon sa Senado niadtong Septiyembre 23 nga may kalabotan sa pag-usab sa voting threshold.
Sa pagkakaron, naghulat na sa aksyon sa korte suprema ang maong petisyon, nga nagpunting sa legal nga isyu bahin sa interpretasyon ug pagpatuman sa voting threshold sa impeachment proceedings.
