Misumite na og pormal nga hangyo alang sa pag-apil sa Regional Comprehensive Economic Partnership o RCEP ang Hong Kong, Sri Lanka, Chile, Bangladesh ug Uruguay aron mapalapdan ang partisipasyon sa regional trade bloc.
Base sa opisyal nga pahayag human sa 58th ASEAN Economic Ministers’ Meeting sa Maynila, pormal nang gisumite sa lima ka ekonomiya ang ilang mga hangyo alang sa accession sa RCEP.
Suportado sa ASEAN economic ministers ang maong mga lakang ug nanawagan nga ipadayon ang proseso sa pagdawat sa mga bag-ong miyembro.
Pasiugda usab sa ASEAN nga kinahanglan magpabiling moderno ug andam sa umaabot ang RCEP aron dali kining makatubag sa nag-usab nga kahimtang sa rehiyonal ug global nga ekonomiya.
Naglangkob ang kasabotan sa libre nga patigayon sa mga produkto ug serbisyo, pamuhunan, intellectual property ug electronic commerce tali sa mga sakop.
Gipasabot sa mga ministro nga importante ang RCEP sa pagpalig-on sa supply chains ug sa pagpalawom sa trade ug investment links sulod sa rehiyon.
Samtang, pinaagi sa pagdawat sa dugang nga ekonomiya, gilauman nga modako pa ang sakop sa regional trade arrangement ug mahimong mas mapalapad ang mga oportunidad alang sa patigayon ug pamuhunan.
