Gipadayag sa usa ka saksi sa Office of the Ombudsman ngadto sa Sandiganbayan nga si Sen. Rodante Marcoleta mismo ang nangayo og campaign donation kang negosyanteng Aristotle Viray, usa sa iyang co-accused sa ₱75 milyon nga plunder case.
Matud ni Maria Melinda Mananghaya-Henson, Director sa Field Investigation Bureau sa Ombudsman, gibase ang maong pahayag sa counter-affidavit ni Viray atol sa preliminary investigation.
Sa maong kaso, giakusahan si Marcoleta sa wala pagdeklarar sa maong campaign donation nga iyang nadawat kaniadtong Enero 2025, samtang miyembro pa siya sa House of Representatives.
Gilangkuban sa ₱75 milyon ang ₱30 milyon nga gikan kang dating congressman Michael Defensor, ₱25 milyon kang negosyanteng Joseph Espiritu ug ₱20 milyon kang Aristotle Viray.
Dugang pa sa saksi nga ang donor’s tax sa ubang donasyon gibayran sa staff ni Marcoleta nga si Ebenezer Santos. Base sa imbestigasyon, ang mga donor miadto usab sa samang notary public sa Pasig aron ipanotaryo ang ilang Deeds of Donation kaniadtong Nobyembre 2025, bisan Enero pa nadawat ang donasyon.
Sumala pa ni Mananghaya-Henson, nakita sa ilang imbestigasyon ang posibleng collusion o conspiracy tali sa mga akusado base sa mga dokumento.
Kahinumdomang giangkon ni Marcoleta kaniadto nga nakadawat siya og ₱75 milyon nga campaign donations apan wala kini niya giapil sa iyang Statement of Contributions and Expenditures o SOCE tungod sa hangyo sa mga donor nga magpabiling anonymous.
Hugot nga gilimod ni Marcoleta ang mga alegasyon batok kaniya, samtang nagpadayon ang bail hearing sa Sandiganbayan
